அமெரிக்க ஜனாதிபதி டொனால்ட் டிரம்பின் நிர்வாகம், அமெரிக்காவுக்கான பயணம் மற்றும் குடியேற்றம் தொடர்பாக விதிக்கப்பட்டுள்ள கட்டுப்பாடுகளை மேலும் கடுமைப்படுத்தும் வகையில், கூடுதல் 20 நாடுகள் மற்றும் பாலஸ்தீன அதிகாரசபை வழங்கும் பயண ஆவணங்களுடன் வருபவர்கள் மீதும் புதிய பயணத் தடைகளை அறிவித்துள்ளது.
இதன்மூலம், இந்த ஆண்டின் தொடக்கத்தில் ஏற்கனவே சில நாடுகளுக்கு விதிக்கப்பட்டிருந்த பயணத் தடைகள் குறிப்பிடத்தக்க அளவில் விரிவடைந்துள்ளன.
புதிய அறிவிப்பின் படி, சில நாடுகளின் குடிமக்களுக்கு அமெரிக்காவுக்குள் நுழைய முழுமையான தடை விதிக்கப்பட்டுள்ள நிலையில், மேலும் சில நாடுகள் மீது பகுதி கட்டுப்பாடுகள் அமல்படுத்தப்பட்டுள்ளன.
பாலஸ்தீன அதிகாரசபை வழங்கும் பயண ஆவணங்களுடன் வரும் நபர்களுக்கும் முழுமையான கட்டுப்பாடு விதிக்கப்பட்டிருப்பதும் முக்கிய அம்சமாகும்.
இந்த நடவடிக்கை, அமெரிக்காவின் நுழைவு மற்றும் குடியேற்ற விதிகளை கடுமைப்படுத்தும் தொடர்ச்சியான முயற்சியின் ஒரு பகுதியாகும் என டொனால்ட் டிரம்ப் தலைமையிலான நிர்வாகம் தெரிவித்துள்ளது.
ஏற்கனவே நடைமுறையில் உள்ள தடைகள் தொடரும் என்றும், புதிய விதிமுறைகள் ஜனவரி 1 முதல் அமலுக்கு வரும் என்றும் அறிவிக்கப்பட்டுள்ளது.
தேசிய பாதுகாப்பு காரணங்களை முன்வைத்து விதிக்கப்பட்ட இந்தத் தடைகள், பல நாடுகளைச் சேர்ந்த மக்களின் பயண உரிமைகளை பாதிப்பதாக விமர்சகர்கள் குற்றம்சாட்டி வருகின்றனர்.