சுவிட்சர்லாந்தின் பெர்ன் பல்கலைக்கழகத்தைச் சேர்ந்த ஆய்வுக் குழு, செவ்வாய் கிரகத்தில் நதிகளின் தடயங்களை கண்டறிந்துள்ளது.
இது, அந்த கிரகம் ஒருகாலத்தில் ஒரு பெரிய பெருங்கடலால் சூழப்பட்டிருந்ததற்கான உறுதியான ஆதாரமாகும்.
பெர்ன் பல்கலைக்கழகம் தலைமையிலான சர்வதேச ஆய்வுக் குழு, செவ்வாய் கிரகத்தை ஆய்வு செய்த விண்கலங்களின் படங்களைப் பயன்படுத்தி, நதியடித்தளங்களை (River Deltas) ஒத்த புவியியல் அமைப்புகளை கண்டுபிடித்துள்ளது.
இந்த ஆய்வு முடிவுகள், அறிவியல் இதழான npj Space Exploration இதழில் வெளியிடப்பட்டுள்ளன.
“நாங்கள் படங்களில் அடையாளம் கண்ட அமைப்புகள், ஒரு நதி பெருங்கடலில் கலக்கும் பகுதியை தெளிவாக காட்டுகின்றன,” என இந்த ஆய்வின் தலைமை விஞ்ஞானி ஃபிரிட்ஸ் ஷ்லூனெகர் தெரிவித்தார்.
தற்போது, இந்த நதியடித்தள அமைப்புகள் காற்றால் உருவான மணற்குன்றுகளால் மூடப்பட்டுள்ளன. இருப்பினும், அவற்றின் அசல் வடிவம் இன்னும் தெளிவாகக் காணப்படுவதாக ஆய்வாளர்கள் கூறுகின்றனர்.
கண்டுபிடிக்கப்பட்ட அனைத்து நதியடித்தளங்களும் ஒரே உயர மட்டத்தில் காணப்படுகின்றன. இதன் மூலம், அந்த காலத்தில் இருந்த கடல் மட்டத்தையும், கரையோரப் பகுதியையும் மீளமைக்க ஆய்வுக் குழுவிற்கு முடிந்துள்ளது.
ஆய்வு முடிவுகளின்படி, அந்த பெருங்கடல் பூமியில் உள்ள ஆர்க்டிக் பெருங்கடலைக் குறைந்தபட்சம் ஒத்த அளவில் இருந்ததுடன், செவ்வாய் கிரகத்தின் வடக்கு அரைகோளமெங்கும் பரவியிருந்ததாக தெரிவிக்கப்படுகிறது.
முன்னைய ஆய்வுகளும் செவ்வாயில் பெருங்கடல் இருந்திருக்கலாம் என சுட்டிக்காட்டியிருந்தாலும், அவை குறைந்த துல்லியமான தரவுகள் அல்லது மறைமுகக் காரணங்களின் அடிப்படையிலேயே அமைந்திருந்ததாக ஆய்வாளர்கள் கூறுகின்றனர்.
புதிய ஆய்வு, தெளிவான மற்றும் நேரடி ஆதாரங்களின் அடிப்படையில் மேற்கொள்ளப்பட்டதாக அவர்கள் வலியுறுத்துகின்றனர்.
இந்த ஆய்வு, செவ்வாய் கிரகத்தில் அதிகபட்ச நீர்மட்டம் சுமார் 3 பில்லியன் ஆண்டுகளுக்கு முன் இருந்ததாகக் கணிக்கிறது. இந்தக் கண்டுபிடிப்பு, ஒருகாலத்தில் செவ்வாய் கிரகத்தில் உயிரினங்கள் உருவாக ஏற்ற சூழ்நிலைகள் இருந்திருக்கலாம் என்பதையும் உறுதிப்படுத்துகிறது.
“செவ்வாயை நாம் ஒரு வறண்ட, சிவப்பு கிரகமாக அறிந்திருக்கிறோம். ஆனால், எங்களுடைய ஆய்வு முடிவுகள், அது ஒருகாலத்தில் ‘நீல கிரகமாக’ இருந்ததை காட்டுகின்றன,” என இந்த ஆய்வின் முதன்மை ஆசிரியர் இக்னேஷியஸ் ஆர்கடெஸ்த்யா தெரிவித்துள்ளார்.
இது, ஒரு கிரகத்தில் நீர் எவ்வளவு மதிப்புமிக்கது என்பதையும், அது காலப்போக்கில் மறைந்து போகக்கூடும் என்பதையும் உணர்த்துகிறது என அவர் கூறியுள்ளார்.